4 Oliviere = Gypsies

Nou nie regtige Gypsies nie maar na dese gaan dit omtrent voel of ons Gypsies is wat so baie rond trek.  Nou net klaar ingeburger hier in Texas Qld - toe ons verneem die huis waarin ons is, is op die mark en daar is 'n koper.

Nou ja, huise is maar skaars soos hoendertande hier in die kleine ou dorpie Texas.  Gelukkig kon die myn darem vir ons 'n ander huis kry.  In die middel van die dorp en loop afstand van alles af.  Ongelukkig verloor ons die stilte van die area waar ons was asook die mooi uitsig vanwaar ons die genot van vele sonsondergange gehad.

Maar wat die nuwe huis ons bied, is meer spasie veral kas spasie - oral oor die huis is heerlike kaste - en waar ons nie eers kaste in ons slaapkamer gehad het nie - is dit nou 'n heerlike verandering om nie die heeltyd in jou klerekas te moet vaskyk nie.

Dieselfde oggend na ons getrek het en na ek die ander plek skoongemaak het - neem ek die sleutels terug na die eiendoms agent - net om te verneem dat die koper se koop deur die mat geval het!  Daar het ons verniet getrek - maar soos dit is, het ons darem 'n lekkerder huis (alhoewel nie lekkerder area nie) uit die trek gekry!