Ons is hier!

Sjoe... wat kan ons sê!  Na die vlieg goed afgeloop het is ons nogtans bly om weer moederaarde onder ons voete te voel!  In Sydney aangekom, moes ons eers ons tasse gaan kry en deur Customs gaan.  Toe moes ons weer ons tasse inboek en is toe met 'n bus na die volgende terminaal geneem waar ons toe 'n kleiner vliegtuig gekry het vir die vlug deur na Wagga Wagga!

Dit was nogals 'n gesig om te aanskou daar vanuit die lug toe ons oor Wagga Wagga area vlieg...die klomp vloedwaters!  Ja, ons kom toe in die middel van 'n vloed hier aan.  Gelukkig waar ons is in Wagga is dit veilig.

Ons het so 8uur die aand se kant in Wagga aangekom - toe skyn die son nog!  Dit word eers hier nader aan 8:30 skemer.

David en Kathy hulle het ons op die lughawe ontmoet.  Vandaar het ons 'n car-rental geneem.  So in die vreemde lyk alles darem deurmekaar, maar gou het ons begin ons voete kry. 

Ons is op die oomblik in tydelike akkommodasie - amper soos 'n selfcatering woonstel by die see (of so voel dit)!

Een oggend vroeg hoor ons darem 'n snaakse geluid hier buite ons woonstel....toe ons uitkyk, sien ons wilde pappegaaie rondvlieg en hulle kom tuismaak hier in 'n boom.  Volgens die locals hier...is hulle (pappegaaie) ook locals!  Ja, blykbaar vlieg hulle wild rond hier.  Die wat ons gesien het is die wit 'cockatoo' met die geel kuif en dan het ons ook al 'n pienkbors pappegaai gesien, wat baie lyk soos die African Grey pappegaai.