Huis, paleis, pandok...tent!!

Die 4Oliviere het besluit dit is bietjie tyd om te gaan kamp!  Ons het stelselmatig so paar kampgoed aangekoop  nadat ons die meeste van ons kampgoed in Suid-Afrika agter gelos het.  Ons hou mos van die buitelewe en natuur en wat beter manier om dit te beleef as om te gaan kamp.

So, ons het die bakkie gepak en sommer hier naby Port Macquarie in die Werrimkimbe Nationale Park (http://www.environment.nsw.gov.au/nationalparks/parkhome.aspx?id=N0042) gaan kamp.

Dit was 'n heerlike naweek met lekker weer en mooi natuurskoon.

Die kinders het allemintige sampioene gepluk en ons verder heerlik vermaak met hul apie streke!

Terwyl Etienne die tent klaar opslaan het ek gou ingespring en ons kombuis opgestel en sommer gou middagete aanmekaar geflans.  Die kinders het gou hand bygesit en vir Daddy gehelp tent opslaan.

Na kamp opslaan en middagete het ons bietjie gaan wandel en die area verken.

Hier probeer ons vroumense 'n modderpoel mis trap!

Die aand het ons heerlik om kampvuur gesit en gesels terwyl Etienne vir ons 'n vleisie op die kole gebraai het.  Nagereg was...ja..natuurlik....marshmellows oor die vuur gebraai!  Lip-aflek-lekker soos mens sal sê!  Die kinders het sommer vroeg vroeg omgedop en gaan slaap.

Die kinders vermaak ons met 'n vuurwerk vertoning!

En wat kan nou lekkerder wees as 'n oggend koffie so uit die blikbeker uit!  Laat my sommer terug dink aan die advertensie met oorlede Jan Spies met sy ou Cremora koffietjie!

Hier lyk Bianca kompleet soos 'n celebrity wat 'n hangover het!

Terwyl ons kamp opgeslaan het, het die kinders weer die bosse en bome ingevaar.

Ons het toe oppad terug huis toe sommer so 'n lekker rit deur die Nationale Park geneem en daar wraggies in die middel van die pad kry ons toe vir Mnr. Slang!  Etienne doen sommer toe 'n nood-stop (so het dit gevoel) en spring soos ou Steve Irwin met 'n "Crickey" uit die bakkie uit...gelukkig net met die kamera in die hand om vir ons 'n foto te kry!