Happy Birthday to me.....

My verjaardag was 'n rustige - warm dag.  Die oggend het Etienne en die kinders vir my koffie in die bed gebring - en natuurlik soos hulle geoefen het, vir Mamma happy birthday gesing!!!

Ons het beplan om na 'n blomplaas net buite Wagga te gaan - maar daar aangekom is die plek gesluit en heropen eers in Februarie.  Van daar het ons maar net 'n entjie rondgery en so in die dorpie Rock geeindig.  Letterlik en figuurlik in die middel van niks en so groot soos.....sjoe, vind dit bietjie moeilik om 'n plek te kry om 'n vergelyking te tref!

Soos die dorp se naam aandui word dit vernoem na die "Rock" - 'n koppie wat nogals lyk soos die Lion King se rotsformasie!  Ons beplan weer 'n - meer beplande - uitstappie soontoe - om dan in die nationale park te gaan rondloop.  Dan wil ons ordentlike skoene aantrek - gestewel en gespoor met 'n lekker piekniek mandjie ook.

Hier is so bietjie inligting:  http://www.lockhart.nsw.gov.au/about/1001/1015.html

Hhmmm, nou nie seker wat hulle met hierdie kennisgewing bedoel nie - maar ons het dit snaaks gevind.


Vandaar is ons terug Wagga toe - en omdat dit middagete se koers was, het ons sommer gaan eet by 'n plekkie met die naam Hogs Breath (http://www.hogsbreath.com.au/).  Dit is amper 'n plek soos 'n mens die Spur in Suid-Afrika sal kry.

Die kos was heerlik, die atmosfeer lekker en ons almal het dit nou geniet.

Die chips word gedraai dat dit lyk soos 'n pigtail.

  

Blomme vir Mamma se verjaardag

Ruan het vir Etienne gehelp om 'n paar blomme in potte te plant!  Ons het 2 potte gekoop met 'n paar blomme om in te plant - net om so 'n bietjie kleur in ons tuin te bring.  Ons het die 2 potte op die agterstoep onder die afdak gesit.

En natuurlik was Supervisor Bianca op haar pos om toe te sien dat die manne 'n ordentlike job doen!

You scream, I scream, we all scream for.....drumstick????

Nou ja, wie sou nou ooit kon dink dat hulle deurmekaar sou raak met roomys en hoenderboudjies??? 

Watter een klink die mees eksoties en laat jou sommer so 'n watertand lekker laat kry na roomys...Cornetto of Drumstick....well, you be the judge...!!!!!

Die kinders geniet bietjie afkoeling buite met roomys en hardloop deur die sproeier....soos ons toe ons nog kinders was...!!

Ons plekkie down under....

Ek het gedink om so 'n paar fotos te deel van hoe ons plek lyk - alhoewel dit maar nog taamlik leeg is sonder ons eie goed - wat nog oppad is!  En dan ook, die plek is huur huis en soos dit ook maar gaan met huur huise - veral die tuin is verwaarloos - maar met 'n bietjie t-l-c gaan die plek sommer vinnig na huis lyk en voel!

Ons huis is op die hoek.  So, dit al klaar sê dat die erf redelik groot is.  Nou nie jou standaard hoekerf groottes wat jy in Suid-Afrika kry nie maar ons kla nie, daar is heelwat speel ruimte vir die kinders en ook genoeg erf om Etienne taamlik besig gaan hou met tuinwerk!



Huise is maar taamlik duur hier - en veral ook jou huurplekke.  Hier word die huur weekliks betaal.  Ons het na heelwat huise gaan kyk - soos ons die adresse in die koerant of op internet sien het ons daar verby gaan ry om 'n gevoel van die omgewing en huis te kry.  'n Mens moet 'n afspraak maak indien jy sou belangstel om 'n huis te gaan besigtig.  Hulle noem dit viewing appointments - dan kom almal op een slag kyk wat belangstel.  Dan dien jy 'n applikasie in - as jy nou sou besluit jy wil die plek huur.  Dan word jou applikasie deur die agent en eienaar goedgekeur.  Hulle noem dit 'n puntestelsel - jy moet 100 punte kry voor jy kwalifiseer vir die huur van 'n plek..... dokumentasie wat jy moet toon wat nou die punte op maak bv. paspoort, bestuurlisensie, dienskontrak, payslip, ens.

Ons was gelukkig om die eerste plek waarvoor ons aansoek gedoen het te kon kry.  'n Mens hoor nogals heelwat van mense wat eers na die derde of so probeerslag gelukkig is om 'n plek te kry.  Die dag toe ons kom kyk het na die huis, was hier iemand anders ook wat sommer daar en dan 'n applikasie vorm ingevul het.  Nou ja, hierdie keer was die geluk aan ons kant....

Die specs van ons huis:  4 slaapkamers, 1 badkamer, groot leefvertrek met oopplan kombuis, laundry kamer, dubbel motorhuis, pakkamer, groot stoep en lekker grassperk.  Daar is ook sulke blinds/afdakkie goed voor elke venster om die son te keer.

 

Winkel konsternasie

Sjoe....wat 'n drama!!!  Ja, elke ma kom dit ook maar een of ander tyd oor.  Maar ai, dit is nogals 'n gevoel wat ek nie sommer weer wil ervaar nie....

Ja, daar raak Ruan toe mos weg in die winkel!!  Ons het by die electronics afdeling geloop en kyk na al die goed en daar is toe 'n lekker flatscreen tv met nogals Open Season 3 wat wys.  Nou ja, eie aan sy aard, haak Ruan toe net daar vas.  Daar is tot 'n lekker bankie waar die kinders kan sit en kyk! 

Ons sê toe vir hom, hy sit mooi en kyk en hy bly daar.  Ons sal hom kom haal.  Ek kyk toe omtrent elke minuut op hom dat hy nog ok is en nog rustig sit en tv kyk.   Maar met my volgende "rondte" is mistertjie mos weg.

Dadelik loop ek na Etienne toe en sê operasie Ruan vind het begin.  Op af, op af....ek begin naderhand te drafstap!  Met die kom daar 'n aankondiging oor die winkel se klankstelsel dat daar 'n seuntjie met die en die klere aan is.  Ek het nie eers klaar geluister nie, net gehardloop (met Bianca) in my arms, Etienne iewers agterna.

Daar sien toe 'n man my aankom en kom nader en vra of dit my seun is.  Ek sê toe ek dink so.  Hy sê toe ek moenie so worry nie hy is ok.  Alles goed en wel.  Ek noem toe maar ja, sien ons eerste taal is nie engels nie en ek glo nie Ruan sou mooi vir hulle kon vertel wat waar wanneer, en al daardie dinge nie!

Maar gelukkig was dit toe Ruan - ewe vol glimlaggies nader gehardloop gekom!  Ja en toe kon diè mamma se hart eers bedaar - en 'n paar knoppe afsluk!!!

Ai ai, wat 'n ondervinding!.....(en ja, ek wil nie eers dink as ons nog in Suid-Afrika was nie...maar dan....daar sou ek Ruan NOOIT so alleen gelaat het nie)

All work ....and....some play!

Die Olivier manne het die naweek wat verby is bietjie in die tuin gewerk.  Die tuin is maar heelwat verwaarloos - soos dit mos maar gaan met huur huise.

Ons het maar so stelsigmatig begin in klim in die tuin - of moet ek nou eerlik wees en sê Etienne het begin inklim!!!  Hy het die naweek met ons nuwe grassnyer gou die grasperk 'n "haircut" gegee en Ruan het net so hard saam gewerk.

Ek sal nog fotos van die tuin en huis op 'n latere stadium post.

Tangled!

Ons het so 'n rukkie terug die kinders vir 'n movie geneem - ons eerste movie experience hier in Wagga.  Ons het Tangled (http://adisney.go.com/disneypictures/tangled/#/home/) gaan kyk.  Dit gaan oor Rapunzel.  Ons het dit nou regtig baie geniet ten spyte van die skok oor hoe duur dit is!!

Die fliekkaartjies en snacks - 1x boks popcorn wat ek en Etienne gedeel het, elkeen 'n koeldrank en vir die kids elkeen 'n kids combo wat 'n klein popcorn, koeldrank en lollipop is - het ons toe so $70 gekos. 

Al was dit nou baie lekker sal dit nie iets wees wat ons gereeld kan gaan doen nie.  Sal maar vir 'n "treat" bly.

Kids a la Picasso!

Om die kids bietjie te entertain met inkleur - en ook nie dat hulle moet dink die mure is mooi oop en groot canvasse nie - het ek sommer bruin papier op die grond vasgeplak (om so seker te maak hulle bly op een plek met die inkleurgoed).

Hulle het dit geniet en dit moes natuurlik so op die grond vasgeplak bly totdat Daddy die aand by die huis kom om ook die "kunswerke" te kon besigtig!!

Cheers, Tjorts, Slàinte.....laat hy val waar wil...

Nou ja om so 'n ou dorsie te les is hier nogals heelwat om uit te kies!  Etienne het maar gegaan met die "meer gebruiklike" - 4 XXXX Gold bier....wat vir my proe na ....bier....!!!

Dan is daar 'n ander "bier"/drankie - CHILL - dis nogals heel lekker, selfs ek drink dit!  Proe baie na 'n Savanah met suurlemoen.  Nogals baie lekker as dit so warm is en jy geniet so 'n yskoue ene!

Etienne sal seker so maar met tyd die ou drinkgoedjies explore (ons is mos nie groot drinkers nie) tot hy dan nou gekry het wat sy ou Windhoekies kan vervang!!

Dag van intrek in ons huis...!!

Die Dinsdag 4 Januarie het vroeg begin vir ons.  Ons moes teen 10uur die oggend uitboek by die tydelike akkommodasie.  Alles gepak en skoongemaak kon ons darem so teen 8:30 se kant al uit wees.  Vandaar het ons net ons tasse en ander los goed by Kathy-hulle gaan los tot en met ons die huis se huurkontrak geteken het en die sleutels kon kry.

Etienne kon darem vroeg afkry by die werk om die kontrak te kom teken.  Ons het ook dan ook vir ons 'n eetkamerstel gekoop, sodat daar darem iets is waarby ons kan sit en eet.  Ons het ook vir Bianca 'n bed gekoop en die kleine madame is heel in haar noppies met haar nuwe bed.  Ruan is ook heel ingenome om nog te wag vir die "trokkie" wat sy bed gaan bring - vir tyd en wyl moet hy maar soos mamma en pappa op 'n matras op die grond slaap.



Ons het toe die middag so teen 4uur se kant die sleutels gekry en kon toe in die huis in.  Aangesien die huis nog nie skoongemaak is nie, moes ons maar vir aandete take aways kry.  Ook maar goed want teen aand se tyd was ons al gedaan en nie nog lus vir kos maak nie!

Die kinders geniet die spasie wat die huis bied baie en om dinge vir hulle nog so 'n bietjie lekkerder te maak is daar tot 'n lekker sandput waarin hulle kan speel.

Die huis het maar net 'n skoonmaak gekort na 'n hele rukkie van toestaan.  Gewoonlik moet die vorige huurder die plek "volgens standaarde" laat skoonmaak maar omdat ons so bietjie druk op die mense uitgeoefen het om vinniger in die huis in te kom, moes ons die huis as "skoon" afteken. 

So far, so good.  Elke dag gaan dinge bietjie meer seepglad en settle ons meer in.  Nou moet ons skippie met ons container net kom dan gaan die plek regtig soos HUIS voel!